ကောင်းခြင်း တရားများအတွက်သာ အသုံးပြုသင့်သော အင်တာနက် || Myanmar Bayan

ကောင်းခြင်း တရားများအတွက်သာ အသုံးပြုသင့်သော
အင်တာနက်

*********
တမန်တော်မြတ် ( ဆွ )ရဲ့ သြဝါဒတော်တွေအရ
ကိယာမသ်ရဲ့လက္ခဏာတွေထဲမှာ လက္ခဏာတစ်ခုက
အကွာအဝေးတွေကျုံ့သွားမယ်လို့သိရပါတယ်။

အကွာအဝေး၊ တစ်နည်း ကွာဟမှုတွေနည်းသွားခြင်းက
နှစ်မျိုးဖြစ်နိုင်တယ်။

တစ်ခုက ပို့ဆောင်ဆက်သွယ်မှုတွေ မြန်ဆန်တိုးတက်
လာလိမ့်မယ်။ လနဲ့ချီပြီးသွားရတဲ့ခရီးက နာရီပိုင်း
အတွင်းရောက်သွားနိုင်မယ်။ ဒါကြောင့် ကနေ့ ကမ္ဘာ့
အစွန်းတစ်ဖက်ကနေ နောက်အစွန်းတစ်ဖက်ကို ၂၄
နာရီအတွင်းဖြတ်သန်းနိုင်လာပြီ။ ရှေးတုန်းက တစ်နှစ်
တောင်လောက်နိုင်မယ်မထင်ဘူး။

ဒုတိယပုံစံက
သတင်းစီးဆင်းမှုမြန်ဆန်တိုးတက်လာလိမ့်မယ်။

အရင်တုန်းက သတင်းတစ်ပုဒ်က ကာလအတန်ကြာမှ
နောက်တစ်နေရာကိုရောက်တယ်။ အပြေးမြန်တဲ့
မြင်းတွေနဲ့ ခိုတွေကိုသုံးရတယ်။ မြင်းစီးကျွမ်းကျင်
သူတွေကတစ်ဆင့် သတင်းတစ်ပုဒ်ဟာ တိုင်းပြည်ရဲ့
အစွန်းတစ်ဖက်က နောက်အစွန်းတစ်ဖက်ဆီရောက်ဖို့ လပေါင်းများစွာကြာခဲ့တဲ့ ကာလတွေလည်းရှိခဲ့တယ်။

စာပို့တဲ့နေရာသုံးတဲ့ ခိုတွေကလည်း အတိုင်းအတာ
တစ်ခုအထိပဲ ပျံသန်းနိုင်တယ်။ ဒါကြောင့် ခိုတွေကို
တိုတောင်းလှတဲ့သတင်းတွေကို ခရီးတိုအတွက်ပဲ
အသုံးပြုနိုင်ခဲ့တယ်။

တစ်ဖြည်းဖြည်းနဲ့ ကြေးနန်း၊ ရေဒီယို၊ တီဗီ၊ တယ်လီဖုန်း၊ မိုဘိုင်းဖုန်းအစရှိတာတွေ ပေါ်လာတော့ သတင်းပျံ့နံှ့မှုအလွန်လွယ်ကူလာကြတော့တယ်။

အင်တာနက်ပေါ်လာတဲအခါ ဒီလွယ်ကူမှုဟာ
အဆုံးအစွန်ထိပါပဲ။

အခုမြန်မာပြည်က ဝေးခေါင်လှတဲ့ ရွာတစ်ရွာက
လူတစ်ယောက်ဟာ အမေရိကန်နဲ့ ကနေဒါလိုအလွန်
တိုးတက်စည်ကားတဲ့ နိုင်ငံတွေကို မျက်စိတစ်မှိတ်
အတွင်းမှာ ပို့ချင်တဲ့ သတင်းတွေကိုပို့နိုင်တယ်။

အလ္လာဟ်အရှင်မြတ်သခင် ချီးမြှင့်ထားတဲ့ အသိာဏ်နဲ့
စူးစမ်းလေ့လာတတ်တဲ့ စိတ်ဓာတ်တွေကို အသုံးပြုပြီး လူသားဟာ အခုလိုတီထွင်ကြံဆမှုတွေ လုပ်လာ
နိုင်တာပါ။

အင်တာနက်ပေါ်လာလို့ အရင်တုန်းက ခက်ခက်ခဲခဲ
ကြမ်းကြမ်းတမ်းတမ်းဖြတ်သန်းဆောင်ရွက်ရတဲ့
အရာတွေဟာ အခုတော့ လွယ်လွယ်ကူကူ ချောချော
မွေ့မွေ့ဖြစ်သွားပါပြီ။

အင်တာနက်ကို မှန်မှန်ကန်ကန်အသုံးချတတ်ရင်
အင်တာနက်ဟာလူ့ရဲ့အသိပညာတိုးတက်မှုရဲ့
သော့ချက်ဖြစ်နိုင်ပါတယ်။ အင်တာနက်လူမှုကွန်ရက်
တစ်ခုဖြစ်တဲ့ Facebook ဟာလူသုံးအလွန်များပါတယ်။

Face match ဆိုတဲ့အမည်နဲ့ အစပြုခဲ့တယ်။
အစပိုင်းမှာ ပုံတွေပဲတင်လို့ရခဲ့တယ်။ အမေရိကန်နိုင်ငံသားကျောင်းသားလူငယ်တစ်ဦးဖြစ်တဲ့မာခ်ဇူကာဘတ်
နဲ့ အပေါင်းအဖော်တွေက တည်ထောင်ခဲ့တယ်။

အဲဒီအချိန်တုန်းက သူတို့ဟာ ဟားဗတ်တက္ကသိုလ်
ကကျောင်းသားတွေပါ။ မိမိအဆောင်မှာ အဆောင်နေ
ကျောင်းသားအချင်းချင်း မိတ်ဆက်တဲ့သဘောနဲ့
စခဲ့တယ်။

ဒါပေမဲ့ ၂၄နာရီအတွင်း တက္ကသိုလ်ကကျောင်းသား ၁၂၀၀ ပါဝင်ခဲ့တဲ့အထိအောင်မြင်ခဲ့တယ်။ဒီလိုနဲ့
တခြားကောလိပ်၊ တက္ကသိုလ်တွေက တစ်စတစ်စ
ပါဝင်လာခဲ့ပြီး ၂၀၀၅ ခုနှစ်မှာတော့ အင်္ဂလန်နိုင်ငံအထိ ခြေဆန့်လာနိုင်ခဲ့တယ်။ ဒီလိုနဲ့ တစ်ဖြည်းဖြည်း တစ်
ကမ္ဘာလုံးအထိ မိမိကွန်ရက်ကို ဖြန့်ကျက်နိုင်ခဲ့ပါတယ်။

Facebook ကို လူအမျိုးမျိုးက ရည်ရွယ်ချက်မျိုးစုံနဲ့
အသုံးပြုကြတယ်။

အာရပ်အာဏာရှင်တွေကိုဖြုတ်ချခဲ့တဲ့ အာရပ်
နွေဦးတော်လှန်ရေးဟာ အဲဒီ Facebook က အစ
ပြုခဲတာပါ။ အာရပ်နွေဦးတော်လှန်ရေးမှာFacebook ရဲ့ အခန်းကဏ္ဍဟာ တော်တော်ကြီးပါတယ်။

Facebook ကြောင့် တစ်ဖက်မှာ လူမှုဆက်ဆံရေးတွေ
တိုးတက်လာပြီး အချင်းချင်းရင်းနှီးမှုတွေ လွယ်သထက်
လွယ်ကူလာနေသလို

နောက်တစ်ဖက်မှာ Facbookကို ကြော်ငြာအတွက်
အသုံးပြုလာကြပါပြီ။ Facebook ဟာ စီးပွားရေး
အတွက်လည်း အသုံးတော်တော်တည့်တာကို
တွေ့ရတယ်။

Facebook ထူထောင်သူ မာခ်ဇူကာဘတ်ကိုယ်တိုင်
လက်တစ်ဆုပ်စာသာရှိတဲ့ ကမ္ဘာ့အချမ်းသာဆုံးလူငယ်
စာရင်းဝင်လာခဲ့ပါပြီ။

အကယ်၍ Facebook ကို ကောင်းတဲ့ရည်ရွယ်ချက်တွေနဲ့ အပြုသဘောဆောင်တဲ့အလုပ်တွေအတွက်သုံးရင်
ဒါဟာကောင်းရာကို ညွှန်ကြားပြီး မကောင်းမှုကို
တားမြစ်တဲ့အလုပ်ဖြစ်မှာပါ။

အထူးသဖြင့် လူငယ်တွေရဲ့ အသိညဏ်ကို အပြု
သဘောဆောင်တဲ့ တိုးတက်မှုနဲ့ အကျင့်စာရိတ္တ
ပျက်ပြားမှုကို တားမြစ်ရာမှာအတော်အသုံးဝင်
ပါလိမ့်မယ်။

ဒါပေမဲ့ လက်တွေ့မှာကြည့်မယ်ဆိုရင် ရည်ရွယ်ချက်
ကောင်းကောင်းထားပြီးအသုံးပြုအများအပြားရှိသလို
ဝမ်းနည်းစရာက လူမှုပတ်ဝန်းကျင်က ဆိုးသွမ်းမိုက်မဲ့သူတွေဟာ မိမိတို့ရဲ့မကောင်းတဲ့ရည်ရွယ်ချက်နဲ့
စရိုက်ဆိုးများကို ပျံ့နှံ့စေဖို့ရာ ဒီအသုံးဝင်လာတဲ့
လူမှုကွန်ရက်ကိုအသုံးချနေတာကိုလည်းတွေ့ရပါတယ်။

ဒါကြောင့်
ကျွန်တော်တို့ဟာ Facebookကို ကိုယ်တိုင်လည်း
မှန်မှန်ကန်ကန်သုံးဖို့နဲ့ ပညာတတ်လူငယ်တွေကိုပါ
မှန်မှန်ကန်ကန်သုံးစွဲလာစေဖို့ ကြံဆောင်ရပါမယ်။

မှားယွင်းတဲ့ သုံးစွဲမှုကနေ မျိုးဆက်သစ်တွေကို
ကယ်ထုတ်ပြီး အဲဒါတွေရဲ့ ပျက်စီးဆုံးရှုံးမှုတွေကို
သိရှိလာပြီး ရှောင်ရှားနိုင်အောင်ကြိုးစားပေးရပါမယ်။

Facebook ကို ကောင်းမွန်စွာ အသုံးပြုရာမှာ
ဒအ်ဝဟ်အတွက်ဖြစ်စေ၊
သင်ပေးသင်ယူမှုအတွက်ဖြစ်စေ၊
မိမိကိုယ်ရေးကိုယ်တာပြသာနာအခက်အခဲတွေ
ပြေလည်မှုအတွက်ဖြစ်စေ
သုံးမယ်ဆိုရင် ဘာပြသာနာမှ ရှိမှာမဟုတ်ပါဘူး။

ဒါပေမဲ့ သူစိမ်းအမျိုးသား၊ သူစိမ်းအမျိုးသမီးတွေနဲ့
မလိုအပ်ဘဲ စကားပြောတဲ့အခါ နောက်ဆက်တွဲ
ပြသာနာတွေ ရှိလာနိုင်ပါတယ်။

အရှက်သိက္ခာရှိသူတစ်ယောက်ဟာ ရှက်စရာစကားကို
ပွင့်ပွင့်လင်းလင်းမပြောရဲပါဘူး။ အရှက်မဲ့တဲ့ စကားတွေကို အမျိုးသားနဲ့ အမျိုးသမီးတစ်ဦးကိုတစ်ဦး Facebook
ကတစ်ဆင့် ပြောနေခြင်းကလည်း မလိုလားအပ်တဲ့
ကိစ္စတွေဖြစ်လာနိုင်ပါတယ်။

ဒါကြောင့် Facebook က မိတ်ဆွေဖွဲ့တဲ့အခါ သတိထားဆင်ခြင်ဖို့ အရေးကြီးပါတယ်။ ဥပမာအားဖြင့်
မွတ်စလင် ဖြစ်မဖြစ် ကွဲပြားမှုမရှိတော့ ဆိုးသွမ်းမှုတွေ၊ ဒုစရိုက်မှုတွေကိုကျူးလွန်နေသူတွေကို မိမိဘဝ
ကြင်ဖော်အဖြစ် မှားယွင်းစွာရွေးမိတတ်ကြပါတယ်။

ကျွန်တော်တို့ပတ်ဝန်းကျင်မှာလည်း ဒါမျိုးတွေ
အများကြီးရှိခဲ့ပြီးပါပြီ။ Facebook မှာ တင်တဲ့ပိုစ်တွေကို
တုံ့ပြန်နိုင်မယ့် နည်းလမ်းသုံးခုရှိတာအားလုံး
သိပြီးသားပါ။

Like သို့မဟုတ် React လုပ်ခြင်း၊
ကြိုက်နှစ်သက်တဲ့အကြောင်းအရာကို Share လုပ်
မျှဝေခြင်း၊ Comment မှတ်ချက်ပေးခြင်းတို့ဖြစ်ပါတယ်။

ဒီသုံးမျိုးနဲ့ပတ်သက်ပြီး အစ္စလာမ့်ရှုထောင်က
ဘယ်လိုရှိလဲဆိုတာကို ဆက်လက်တင်ပြပေးပါမည်။

မော်လဝီ ဟာဖိဇ် မုဟမ္မဒ် ယူစွတ်ဖ် - ဇီးကုန်း